سەربازی چیرۆکێکی بێ کۆتایی

سەربازی چیرۆکێکی بێ کۆتایی
نەتەوەیەک کە بە درێژایی مێژوو لەگەڵ خەون و خواست و ئەفسانە دەژی و دووبارە و سێجارە هەمان گێڕانەوەکان بە قاڵبی نوێ بنیات دەنێتەوە؛ مێتافۆرێک بۆ گەلێک کە هەمیشە خەریکی شەڕێکی بێکۆتاییە؛ شەڕێک بۆ هەبوون، بۆ ئەوەی بە فەرمی بناسرێتەوە، بۆ گێڕانەوەی چیرۆکی خۆی؛ گیرۆدە لە دڵی چیرۆکێکی بێکۆتادا؛ مێژوویەکی دوور و درێژی بەرخۆدان و سەرکوت و هیوا و دووبارە بنیاتنانەوەی ناسنامە؛ نەتەوەیەک کە ناتوانێت لە بازنەی مێژوو دەرباز بێت، چونکە هێشتا مافی گێڕانەوەی خۆی بە تەواوی بەدەست نەهێناوە؛ وەک سەربازی شەترەنجێک کە دەتوانێت ببێتە وەزیر بەڵام بە هۆکاری جۆراوجۆر، سەرباز دەمێنێتەوە؛ و هێشتا بچووکترین و سنووردارترین پارچەیە لە یارییەکەدا؛ هەرچەندە توانای گۆڕانکاری بنەڕەتی هەیە؛ لە “ئامراز”ەوە بۆ “ئەکتەر”، لە “قوربانی”ەوە بۆ “هێز”، لە “بێدەنگی”یەوە بۆ “بانگەواز”.
بەڵام هەرگیز ناگاتە ئەو ئاستە. یان نایەوێت؟!
ڕێگاکە پڕە لە ئاستەنگ و قوربانیدان و یاری گەورەتر و هەندێک جار یەخسیری خودی پێکهاتەی یارییەکە، کە دەبێت سەربازەکان لە ناوەڕاستی ڕێگادا لەناوببرێن.
نەتەوەی کورد هەمیشە سەربازێک بووە کە بەهرە و مافی ئەوەی هەیە ببێتە وەزیر، بەڵام بە درێژایی مێژوو هەر جارێک لە یەکێک لە خانەکان دەوستێت یان دەبێتە قوربانی ستراتیژی دەسەڵاتە گەورەکان یان خۆی دەکاتە قوربانی سوارەکانی دیکە.
سادەیە؛ سەربازی شەترەنج بەرەو پێشەوە دەڕوات، نەخشەی یارییەکە دەگۆڕێت و دەتوانێت کارتێکەر بێت لە ڕەوتی گشتی یارییەکە، تەنها دەبێت باوەڕ بەوە بکات کە مافی ئەوەی هەیە ببێتە وەزیر…. و ئەو ڕاستییەی کە هەمیشە کۆچ دەکات…. و هێشتاکانێش فرەیەک دژایەتی و پڕاوپڕ لە دژوازی….
تێبینی: سەربازی چیرۆکێکی بێ کۆتایی، بەشێکە لە دیالۆگی فیلمی “سێ هەزار ساڵ حەسرەت”، جۆرج میلەر
وێنە: دە ساڵ پێش ئێستا، کاتی سەفەر، سنووری باشوور و باکوور؛ تۆ بێژی گەڕانەوەیەک ببێت؟