تێکچوونی ناسنامەپارچەبوون

تێکچوونی ناسنامەپارچەبوون
یەکێک لە کاریگەرییە هەرە گرینگەکانی داگیرکاری بە تایبەت ئەگەر دەمێکی درێژ بخایەنێت “تێکچوونی ناسنامەپارچەبوون” (DID)ە کە کارتێکەری قووڵی مەعریفی و دەروونی بە شێوازی تاک و کۆ لە سەر مرۆڤی داگیرکراو دادەنێت و دوابەدوای پلان و سیاسەتەکانی فەرهەنگی و کۆمەڵایەتی داگیرکەر، سەرەتا دەبێتە هوکاری “دیسترۆفی ناسنامەیی”  یان “وەرینی شوناس” و “پارچەپارچەبوونی شوناس” و دوای جێگیربوونی لە کۆمەڵگای داگیرکراو، وەکوو “سێندرۆمی داگیرکراو”، دەبێتە دیاردەی دەستەجەمعی و هەڵسووکەوتی ئاسایی تاک و کۆ.
بە چەند قۆناغدا تێدەپەڕێ لەوانە:
دڵەڕاوکێی سەرەتایی،
ململانێی دەروونی،
قەیرانی ناسنامە،
لەکیسچوونی بەرزەخۆیی،
خۆ بەنوقسانبینی،
خۆدۆڕاندن،
پارچەپارچەبوونی کەسایەتی و ناسنامە.
لە قۆناغی پارچەپارچەبوونی کەسایەتی و ناسنامە، ئەوەی بوونی نامێنێت شوناسی سەرەکییە و مرۆڤ چ بە تاک و چ بە دەستەجەمعی، پەنا بۆ وردشوناسگەلێک دەبات وەکوو “ناوچە و زید”، “زاراوە و بن زاراوە”، “ئایین و ئایینزا”، “ئایدیۆلۆژی”، “حیزب و تاقم” و ئەوەندە گەورەی دەکاتەوە کە دەبێتە جێگرەوەی ناسنامەی بنەڕەتی و بە دەمارگرژی و فاناتیزم، دیوارێک درووست دەکات لە خودی باڵا و ئەویدییە جۆراوجۆرە ناوخۆییەکان.
ئەمە قۆناغێکە کە چیدیکە پێویستی بە سیاسەتەکانی داگیرکەر نییە و مرۆڤی قوربانی، خۆی ئیتر بە شێوازی ئوتۆماتیک، ڕەوتی خۆڕووخێنەری شوناس و ناسنامە لە قاڵبی پێداگری شەلم کوێرم ناپارێزم بۆ پێداگری لە وردەشوناس، بەرەو پێش دەبات و زۆرجار لە چەشنی چەندکەسایەتی، تەنانەت هەڵگری چەند وردەشوناسیش دەبێت و دواجار پەنا دەبات بۆ گشتاندنەکەی سیستەمی داگیرکەر…..
Dissociative identity disorder