کوردستان و کردستان

کوردستان و کردستان
ململانێی “کوردستان” و “کردستان” لە ڕۆژهەڵات، هێدی هێدی، خۆی ئاشکراتر دەردەخات و چیدیکە دژوارە مرۆف بتوانێ هەوڵی ڕاگرتنی باڵانس بدات؛ لە ڕاستیدا ڕووبەڕووبوونەوەی دوو جیهانبینی، دوو جیهانژین، دوو ئەندیشە، دوو بیر کردنەوە، دوو ڕوانگە، دوو ئایدیا و بگرە دوو ئایدیۆلۆژییە کە وەک دوو خەتی هاوتەریب، هەرگیز بە یەکتر ناگەن؛ فەزای شەڕ، عەقڵی گشتی کۆمەڵگای ڕۆژهەڵاتە و ململانێی ئایدیۆلۆژیک بۆ بەدەستهێنانی مێشک و دڵی خەڵکە؛ و ڕووبەڕووبوونەوەی وینین و چەمکەکان و ئیماژەکان و ئاماژەکان.
کوردستان و کردستان، دوو جیهانی تەواو جیاوازە؛ جیهانێکی ئێرانی و جیهانیکی کوردستانی، ئۆبژە و سووژە، خودی کوردی و ئەویدی ئێرانی بەرانبەر خودی کوردی ئیرانی، کوردایەتی مەعریفی بەرانبەر کوردبوونی سیاسی، حەقیقەت ڕووبەڕووی مەسڵەحەتی سیاسی و….
لەم دوو جیهانی نوێی کوردستان و کردستان، چیدیکە ناتوانی، دەستی چەپ لە سەر دڵی “کردستان” دابنی و بە دەستی ڕاست بنووسی “کوردستان”، قەلبی سیاسیت لە تاران بێت و قاچەکانی هەست و سۆزت لە ڕۆژهەڵات، لە چوارچێوەی کردستان سیاسەت بکەیت و لە کوردستان بێژی: دواجار هەموومان سەربەخۆییخوازین؛ هەم ناڵ و هەم لە بزمار، حەقلی مەقۆی کوردستان و کردستان و…. خۆڵکردنە چاوی خەڵک، نایخوات.
ململانێی ئایدیاکان، ململانێی کوردستان و کردستان، ململانێی بەهاکانیشە هەرواتر.

هەم کوردستان هەم کردستان، چیدیکە وڵامدەر نییە، شۆڕشی ژینا یەکلایی کردەوە: یان کوردستان یان کردستان….
تەنیا یک تکا: ڕێگە بدەین کە ئەم ململانییە، تەندروست و خاوین و لە سەر بنەماگەلی ڕێز و لۆژێک بچێتە پێشەوە، سەنتێز بەرهەم بهێنێت و دواجار ببێتە “خێری گشتی” بۆ ڕۆژهەڵات و بۆ هەموو کوردستان….